ភ្នំពេញ៖ អាជ្ញាធរកាលពីថ្ងៃទី៣១ ខែឧសភា ឆ្នាំ២០២៣ បានស្រាវជ្រាវ និងចាប់ខ្លួនជនសង្ស័យជនជាតិចិនម្នាក់ រួមទាំងរឹបអូសបានគ្រឿងញៀនជិត ៤០គីឡូក្រាម និងសារធាតុមិនច្បាស់ជិត ១៧០គីឡូក្រាម ក្នុងទីតាំងចំនួន ២គោលដៅក្នុងរាជធានីភ្នំពេញ។
ជនសង្ស័យឈ្មោះ អ៊ូ សាំងយ៉ុង ជាជនជាតិចិន។ អាជ្ញាធររឹបអូសបានគ្រឿងញៀន និងសារធាតុមិនច្បាស់ជាង ២០០គីឡូក្រាម នៅគោលដៅចំនួន២ គឺទីតាំងទី១ នៅតាមបណ្ដោយផ្លូវ R១២ គម្រោង៨ ក្នុងបុរីប៉េងហួត ភូមិបឹងឈូក សង្កាត់និរោធន៍ ខណ្ឌច្បារអំពៅ រាជធានីភ្នំពេញ ចាប់យកវត្ថុតាង កេតាមីន ៩៨២ក្រាម។
ទីតាំងទី២ នៅផ្ទះលេខ៤៨ ផ្លូវលេខ០២ ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ ចាប់យកវត្ថុតាង MDMA ៣១៤៤៩,៨០ក្រាម មេតំហ្វេតាមីន ៤២០៤,៤៨ក្រាម កេតាមីន ៧១០ក្រាម នីមេតាហ្សេប៉ាម ៣៤ក្រាម សារធាតុមិនច្បាស់ ១៦៦,៥៨៥ក្រាម និងឧបករណ៍សម្រាប់កែច្នៃ វេចខ្ចប់មួយចំនួន។
ជនសង្ស័យ និងវត្ថុតាង ត្រូវបានកម្លាំងជំនាញកសាងសំណុំរឿង បញ្ជូនទៅសាលាដំបូង រាជធានីភំ្នពេញ ចាត់ការតាមនីតិវិធី៕
